الوقت إله معنى مختلف من بلد لبلد. بالأردن، الناس عادةً بياخدوا المواعيد بطريقة سَلِسة. يعني لو حدا تأخر شوي، ما حدا بزعل، لأنهم بيشوفوا العلاقة أهم من الدقايق. أهم شي تكون النية طيبة والكلام لطيف. أما ببريطانيا، الوضع غير، الناس هناك ملتزمين كتير بالمواعيد، وكل شي محسوب بالدقيقة. حتى لو الموعد بس مع صديق، لازم توصل عالوقت بالزبط لأنو التأخير ممكن ينفهم إنه قلة احترام. الفرق هون مش مين الصح ومين الغلط، بس كل مجتمع عنده طريقته بالتفكير. بالأردن بيهتموا بالراحة، وببريطانيا بيهتموا بالنظام، لما نعرف كيف الناس بيفكروا، بصير التعامل أسهل وأريح للطرفين.

الهجرة مش بس انتقال من بلد لبلد، هي كمان انتقال من ثقافة لثقافة. المهاجر عادةً بيحاول يحافظ على لغته وأكله وعاداته، بس بنفس الوقت لازم يتعلّم لغة جديدة ويتأقلم مع المجتمع الجديد. مرات هاد الدَمِج بين الثقافتين بيخلق هوية غنية ومتنوعة، ومرات بيعمل صِراع داخلي خصوصاً عند الجيل الأول. أما الجيل التاني من المهاجرين، فَ همه عادةً بيكونوا أقرب لثقافة البلد المُضيف، ومع هيك بيحاولوا يحافظوا على جزء من ثقافة أهلهم. هيك بصير المجتمع الجديد مزيج من عادات مختلفة، وهاد الخليط ممكن يخلق تحديات، بس بنفس الوقت مصدر قوة وتنوّع.

أسلوب اللبس بيعكس ثقافة الناس وطريقة حياتهم. بالأردن، اللبس بيختلف حسب المكان والناس. بالنسبة للمحافظين، همه بيميلوا للبس المحتشم أكتر، خصوصاً البنات. بس بعمان مثلاً، الوضع أريح واهون، والناس حرين بأختيار لبسهم حسب راحتهم أو الموضة. اللبس هناك كمان مرتبط بالمناسبات، يعني لما تروح ععرس أو عزيمة، لازم تلبس بطريقة مرتبة لانه هاد بيعكس احترامك للمكان والناس. أما بألمانيا، فالموضوع مختلف شوي، الناس هناك عندهم حرية كبيرة باللبس، وما حدا بيتدخل شو التاني لابس. ممكن تشوف ناس لابسين بطريقة غريبة أو بسيطة جدًا، وما حدا بيعلّق عليهم. كمان الجو بيلعب دور كبير، لأنه الجو بارد أغلب السنة، فالناس بيتركّز أكتر على اللبس العملي الدافي. الفرق بين البلدين بيورجينا كيف الثقافة والمجتمع بيأثروا على اختيارات الناس حتى بالأشياء الصغيرة مثل اللبس.